Freedom Church Porth

Fe symudon ni (Stephen a Lisa) i’r Cymoedd o Gaerdydd yn ôl yn 2022 gyda’n dau o blant. Gwyddom fod Duw yn ein galw, rhywbeth gadarnhawyd gan amryw, felly dyma symud i Donyrefail i gefnogi cangen allan o'n heglwys, Freedom Church. Ar ôl treulio peth amser yno fe wnaeth Duw ein harwain yn glir i gychwyn heglwys ein hunain yn ein cartref newydd yn y Porth sydd ond dros y mynydd.

Ac felly fe ddechreuon ni gyfarfod fel Freedom Church Porth yn ein tŷ ni ym mis Ionawr eleni, dim ond dau fis cyn i’n trydydd plentyn gyrraedd.

Yn y misoedd canlynol fe dreulion ni amser yn adeiladu cymuned a buddsoddi yn nheulu’r eglwys a ddarparodd Duw. Wrth weld y ffrwyth anhygoel a bywydau y rhai yr ydym yn byw gyda hwy yn cael eu newid, cawsom weledigaeth i ehangu, felly ym mis Medi symudom i leoliad yr oedd Duw yn amlwg yn ein harwain ato.

Rydym nawr yn cyfarfod yn The Welsh Hills Works yn y Porth, a adnabyddir yn lleol fel Y Ffatri Bop. Rydyn ni'n llogi un o'r ystafelloedd llai gyda'r weledigaeth i dyfu ac yn y pen draw symud i'r ystafell digwyddiadau mawr. Rydym hefyd yn cynnal astudiaeth Feiblaidd wythnosol a chyfarfod gweddi, yn ogystal â noson menywod a dynion bob mis. Mae pob un ohonynt yn helpu i adeiladu undod ac yn ein harfogi â gwybodaeth yn ogystal â dyfnhau ein ffydd.

Mae Eglwys Freedom Porth yn awyddus i weld mwy o bobl yn ymuno â’r teulu i brofi perthynas â’r Iesu sy’n newid bywyd, ac i weld y Porth a’r ardaloedd cyfagos yn cael eu trawsnewid.

Yr ydym yn argyhoeddedig ein bod ar ddechrau symudiad o eiddo Duw ac mae wedi ein cyffroi’n fawr gyda gweledigaeth ar gyfer cymoedd y Rhondda yn gyffredinol. Yr ydym am weld mwy o eglwysi yn cael eu plannu ar hyd y Cymoedd, rhywbeth sy’n cytuno â nifer o eiriau proffwydol a lefarwyd dros ein heglwys yng Nghaerdydd.

Credwn yn yr Ysbryd Glân a bod doniau’r Ysbryd yn chwarae rhan fawr wrth adeiladu teyrnas Dduw a’n harfogi fel Cristnogion.

Pwyntiau gweddi

• Yr ydym am weld ein pobl yn profi iachawdwriaeth ac adferiad ym mhob agwedd o’u bywydau. Y byddant yn gweld eu pobl yn cael eu gwared yn llawn, yn ffrwythlon ac yn gynhyrchiol ym mhob rhan o'u bywydau. O gyllid, i iechyd, i berthynas, ac i gymod gyda’u teuluoedd.
• Y bydd Duw yn sianelu peth o adnodd ei deyrnas inni, ac wrth inni weld pobl newydd yn dod trwy ein drysau y byddwn wedi ein paratoi a’n harfogi’n well i dderbyn a chroesawu’r cynhaeaf.
• Yr ydym yn dyheu am weld cynnydd mewn arwyddion a rhyfeddodau, y gallu gwyrthiol y mae Duw yn ei addo yn Ei air.